Konur gerðu garðinn

Síðast uppfært: Mánudagur, 14. maí 2012 11:28 Mánudagur, 14. maí 2012 09:30

Buslað í tjörninni á fallegum sumardegi. Ljósmyndari Björgvin Steindórsson.

Árið 1909 áttu fjórar frúr á Akureyri sameiginlegan draum: Að setja á laggirnar lystigarð fyrir almenning þar sem bæjarbúar ættu þess kost að dvelja sér til hressingar og ánægju... Þessar konur voru þær frú Anna Stephensen kaupmannsfrú, Alma Thorarensen lyfsalafrú, María Guðmundsson bæjarfógetafrú og Sigríður Sæmundsen prestsfrú, síðar vígslubiskupsfrú.

Þær rituðu bréf til bæjarstjórnar og sóttu um að fá landspildu undir skrúðgarð. Þeirra ósk var að bærinn myndi láta af hendi land sem væri 7 engjadagssláttur (1 dagslátta: 30x30 faðmar) að stærð. Með bréfinu fylgdi tillaga Koefoed-Hansen skógræktarstjóra um fjögur lönd í bænum sem vel gætu hentað til skrúðgarðagerðar. Í frétt sem birtist í blaðinu Gjallarhorni þann 8. september árið 1910 er greint svo frá:

„Lengi voru ráðagerðir um hvar hann skyldi vera. Talað var um Gilið upp af mið-innbænum, Hlíðina ofan við útbæinn og ýmsa bletti í landareign Hamarkots og Bandagerðis. En í júlí (1909) fengu forstöðukonurnar Kofoed-Hansen skógræktarstjóra í landkönnunarferð með sér og var staðurinn valinn í þeim leiðangri. Neðsti hluti Eyrarlandstúnsins, sunnan við gagnfræðaskólann, beint upp að landareign Guðlaugs bæjarfógeta. Þar er mjög fagurt útsýni. Til norðurs sér út yfir Eyjafjörð svo langt sem augað eygir, en til suðurs inn til fjallanna, yfir Eyjafjarðará er hvíslast utanum Hólmana í óteljandi bugðum. Og beint framan við er Akureyrarhöfn. Pollurinn þar sem Vaðlaheiði stendur á höfði, um blækyr vorkvöld og glóbjartar hásumarnætur!“

Lesa nánar: Konur gerðu garðinn

Íslensk grein í rúmensku skjalatímariti

Síðast uppfært: Miðvikudagur, 16. maí 2012 20:17 Sunnudagur, 13. maí 2012 23:42

Í nýútkomnu hefti Revista Arhivelor, Archives Review, nr. 2 LXXXVI (2009)  sem gefið er út af  Þjóðskjalasafni Rúmeníu (Arhivele Naţionale ale României), birtist grein Gunnars Marels Hinrikssonar skjalavarðar í Héraðsskjalasafni Kópavogs „Icelandic Demographic Documents from the Turn of the 17th Century“ eða Lýðfræðileg skjöl á Íslandi í kringum aldamótin 1700. Þetta er yfirlitsgrein um efnið en Gunnar hefur áður gert þessum efnum og tengdum skil í prófritgerð sinni frá Háskóla Íslands árið 2007 Um aukaskattheimtu konungs af hans landi Íslandi : stríðshjálpin 1679-1692  og í greinum um stríðshjálpina 1680 og kvikfjártalið 1703 í Ársriti Héraðsskjalasafns Kópavogs og Árnesingi, tímariti Sögufélags Árnesinga.

Átak um skjöl íþróttafélaga

Síðast uppfært: Mánudagur, 23. apríl 2012 13:53 Miðvikudagur, 18. apríl 2012 21:12

Á blaðamannafundi er haldinn var um átakið í Borgarskjalasafni Reykjavíkur 18. apríl 2012. F.v. Þorsteinn Tryggvi Másson héraðsskjalavörður Árnesinga, Birna Mjöll Sigurðardóttir héraðsskjalavörður Mosfellsbæjar, Svanhildur Bogadóttir borgarskjalavörður Reykjavíkur, Ólafur Rafnsson formaður Íþrótta- og Ólympíusambands Íslands, Hrafn Sveinbjarnarson héraðsskjalavörður Kópavogs og Örn Andrésson formaður afmælisnefndar ÍSÍ.

Íþrótta- og Ólympíusamband Íslands fagnar í ár 100 ára afmæli sínu með ýmsum hætti.

Í dag, 18. apríl 2012 eru 100 dagar í Ólympíuleikana, stærsta íþróttaviðburð í heiminum, mikil saga tengist leikunum en Íslendingar kepptu þar fyrst árið 1908 í glímu. Í tilefni af 100 ára afmæli Íþrótta- og Ólympíusambands Íslands hefur sambandið og Félag héraðsskjalavarða á Íslandi hafið samstarf um söfnun og skráningu á skjölum íþróttafélaga og íþróttatengdum skjölum s.s. sendibréfum, ljósmyndum, myndböndum, fundargerðum, mótaskrám, félagaskrám, bókhaldi, og merkjum.

Í skjalasöfnum íþróttafélaganna felst vitnisburður um starfsemi þeirra í frumheimildum; hvaða hugsjónir voru að baki, um baráttu, þrotlausar æfingar til að ná árangri, töp og glæsta sigra, dugnað og elju einstaklinga við uppbyggingu félaganna, oft í ólaunuðu sjálfboðaliðastarfi. Mikilvægt er að skjalasöfn íþróttafélaganna glatist ekki, heldur séu varðveitt tryggilega og aðgengilega á skjalasöfnum landsins.

Lesa nánar: Átak um skjöl íþróttafélaga