hs.bkdata.net
Gildandi reglur Þjóðskjalasafns um rafræna skjalavörslu úreltar
Miðvikudagur, 01. september 2010 21:59
Í dag þann 1. september 2010 tóku gildi gjörbreyttar reglur Dana varðandi rafræna skjalavörslu og langtímavarðveislu rafrænna skjala. Með þessum nýju reglum er skilaskyldum aðilum gert kleift að varðveita rafræn skjalasöfn í heild sinni og kostnaður við gerð vörsluútgáfna og langtímavarðveislu rafrænna skjala minnkar. Jafnframt er gagnaöryggi rafrænna skjala aukið.
Þjóðskjalasafn Íslands tók ákvörðun um að skilaskyldir aðilar á Íslandi, þar með talið sveitarfélög og stofnanir þeirra, skuli fylgja reglum Dana varðandi rafræna skjalavörslu. Þjóðskjalasafn lét þýða hinar nú úreltu dönsku reglur fyrir nokkrum árum og voru þær birtar í Stjórnartíðindum 23. júlí sl. og tóku gildi 1. ágúst 2010. Ekki er útlit fyrir að hinar nýju dönsku reglur verði teknar upp á næstunni.
Fyrir sveitarfélögin skiptir miklu máli að halda niðri kostnaði við rafræna skjalavörslu um leið og öryggi hennar sé ótvírætt. Það er brýnt hagsmunamál fyrir þau og aðra skilaskylda aðila að úr þessu sé bætt. Það er ekki hægt á meðan hinar nýsettu, nú úreltu reglur Þjóðskjalasafns eru í gildi. Því er brýnt hagsmunamál fyrir skilaskylda aðila að reglur Þjóðskjalasafns verði endurskoðaðar hið fyrsta.
Það er fagnaðarefni að Dönum hafi tekist að minnka kostnað og auka gagnaöryggi. Um leið er mikilvægt að rugla ekki saman rafrænni stjórnsýslu og rafrænni skjalavörslu. Rafræn stjórnsýsla getur grundvallast á pappírsskjalavörslu. Tilgangur rafrænnar stjórnsýslu er fyrst og fremst að auðvelda aðgang að upplýsingum og bæta þjónustu. Umræða um rafræna skjalavörslu hefur ýmist snúist um rafræna stjórnsýslu eða tæknilegar útfærslur í stað þess að taka á grundvallarspurningum um skjalavörslu. Hafa verður hugfast að skjalavarsla snýst ekki aðeins um varðveislu upplýsinga, heldur um varðveislu á skjölum, en skjöl innihalda upplýsingar og fela jafnframt í sér sönnun á gildi þeirra.
Hér fyrir neðan eru tenglar á hinar nýju dönsku reglur.
Norræni skjaladagurinn 2010
Föstudagur, 27. ágúst 2010 13:41
Norræni skjaladagurinn 2010 verður haldinn laugardaginn 13. nóvember. Þema dagsins er samnorrænt að þessu sinni, "veður og loftslag". Almenn ánægja er með þemað enda út miklu að moða þegar horft er á safnkost skjalasafnana.
Nefnd um Norræna skjaladaginn í húsakynnum Héraðsskjalasafns Árnesinga.
Nefnd um Norræna skjaladaginn kom saman í húsakynnum Héraðsskjalasafns Árnesinga á Selfossi fimmtudaginn 26. ágúst og lagði drög að undirbúning fyrir skjaladaginn. Eins og undanfarin ár verður búin til vefur skjaladagur.is þar sem gefur að líta framlag frá söfnunum. Þá verða sum safnana með opið hús á þessum degi og kynna starfsemi sína.
Í nefndinni eru Svanhildur Bogadóttir borgarskjalavörður, Eiríkur G. Guðmundsson, formaður, Benedikt Jónsson og Jón Torfason frá Þjóðskjalasafni Íslands og Þorsteinn Tryggvi Másson héraðsskjalavörður.
ÞTM
Nýjar reglur um skjalavörslu sveitarfélaga
Þriðjudagur, 17. ágúst 2010 13:27
Þjóðskjalavörður hefur látið birta sex reglur í stjórnartíðindum um skjalavörslu. Fimm þessara reglna gilda meðal annars um sveitarfélög og stofnanir þeirra og fyrirtæki á þeirra vegum. Regla nr. 627 snýr eingögnu að sveitarfélögum og stofnunum þeirra. Reglurnar tóku allar gildi 1. ágúst 2010. Nánari upplýsingar er hægt að nálgast á héraðsskjalasöfnunum. Þau sveitarfélögn sem ekki eru aðilar að héraðsskjalasafni geta leitað til Þjóðskjalasafns Íslands.
Hér fyrir neðan er hægt að nálgast reglurnar á pdf formi.
Nr. 622. Reglur Þjóðskjalasafns Íslands um málalykla afhendingarskyldra aðila.
Nr. 627. Reglur Þjóðskjalasafns Íslands um grisjun í skjalasöfnum sveitarfélaga og stofnana þeirra.
Austfirskar fréttir
Síðast uppfært: Mánudagur, 09. ágúst 2010 13:00 Mánudagur, 09. ágúst 2010 09:52
Ný ljósmyndasýning er komin á heimasíðu Héraðsskjalasafns Austfirðinga. Sýningin nefnist Austfirskar fréttir og er hún helguð fréttamyndum frá árabilinu 1985-2004.
Seinni part vetrar árið 1997 sagði Austri frá grisjun í Geitagerðisskógi þar sem unnir voru girðingastaurar. Myndin sýnir Hákon Aðalsteinsson skáld og skógarbónda við störf. Austramynd (ljósmyndara er ekki getið).
